A Berna ha la polizia impedì ina nova demonstraziun da critichers da las mesiras da corona. Perquai era la Plazza federala serrada dapi mezdi. La polizia ha controllà e tramess davent gruppas da persunas ch'eran da viadi cun transparents. Singuls demonstrants hajan ins prendì sin il post da polizia, hai num tar la polizia chantunala da Berna.
A Turitg ha la polizia da la citad schlià demonstraziuns illegalas cun radund 80 participants, quai tenor atgnas indicaziuns. Plinavant haja la polizia controllà e tramess davent persunas. Cunter 39 persunas dettia ina denunzia. Talas hajan violà l'ordinaziun federala. A Basilea èn 30 persunas sa radunadas avant la chasa-cumin. Là n'haja dà naginas fullas da persunas. Suenter ch'ina patruglia da la polizia saja stada sin il plaz, saja la demonstraziun sa schliada.
Demonstraziuns pitschninas èn lubidas
Ultimamain ha la Confederaziun lubì da demonstrar. Però dastgan sulet tschintg persunas demonstrar communablamain. Las diversas gruppas na dastgan betg esser datiers ina da l'autra ed er betg avair in connex tematic.
Las emprimas duas sondas dal matg avevan tschients persunas demonstrà a Berna cunter las mesiras da corona da la Confederaziun. La sonda passada ha lura la polizia impedì ina demonstraziun.
