Siglir tar il cuntegn
Inhalt

Svizra Berna vul vegnir encunter als chantuns donaturs

En il cumbat per la gulivaziun da finanzas interchantunala cloma la directura da finanzas bernaisa ad in cumpromiss. «Omaduas varts ston sa muventar» ha ditg Beatrice Simon e manegia cun quai tant ils chantuns donaturs sco era ils chantuns retschaviders.

La directura da finanzas bernaisa Beatrice Simon vi dal discurrer.
Legenda: La directura da finanzas bernaisa crai ch'ils chantuns retschaviders stoppian vegnir encunter las chantuns donaturs. Keystone

En la debatta actuala per la gulivaziun da finanzas han il Cussegl federal ed il Cussegl naziunal vulì levgiar ils chantuns donaturs. Il Cussegl dals chantuns era dentant encunter. Sche la fatschenta, ch’è actualmain puspè tar il Cussegl naziunal, fa naufragi, lura vala il conclus federal d’enfin qua anc 2 ulteriurs onns. Fin il 2017 stoi dar ina soluziun.

Ir sur ils cudeschs

Enfin ussa n’eran ils chantuns donaturs ed ils chantuns retschaviders betg dad in maini. Sco quai che la directura da finanzas dal chantun Berna, Beatrice Simon, ha ditg a la «Berner Zeitung», stoppian ils pertutgads ir sur ils cudeschs. «Il mument sa mussa ina confruntaziun che nagin vul, nus chantuns retschaviders cunzunt betg. Perquai crai jau che nus stuain vegnir encunter als chantuns donaturs».

Il chantun Berna è il pli grond retschavider da daners cun ina summa da 1,2 milliardas francs ad onn.

Widmer-Schlumpf beneventa

La ministra da finanzas Eveline Widmer-Schlumpf ha beneventà il moviment tar ils chantuns retschaviders. Sco quai ch’ella ha ditg a radio SRF, saja pussaivel ch’il parlament chattia tuttina in cumpromiss politic. Il mument saja quel entant anc lunsch davent.