Siglir tar il cuntegn

Header

video
Alain Berset sin visita tar il chancelier tudestg Olaf Scholz
Or da Tagesschau dals 18.04.2023.
laschar ir. Durada: 3 minutas 29 Secundas.
cuntegn

Berset sin visita tar Scholz «Ins na po betg pretender che nus violain nossas leschas»

  • La Svizra na mida betg ses avis en connex cun dar vinavant material d'armament en l'Ucraina.
  • Quai ha il president da la Confederaziun, Alain Berset fatg cler durant ina conferenza da pressa suenter ils discurs cun il chancelier tudestg, Olaf Scholz.
  • Scholz ha sincerà quant unids che la Svizra e la Germania sajan. Quai sa mussia en la collavuraziun.

«Nus ans engaschain per democrazia, il stadi da dretg, ils dretgs umans e l'urden internaziunal en tut il mund», ha ditg Scholz suenter l'inscunter cun Berset. «Da s'engaschar a moda communabla per questas valurs è dapi ils 24 da favrer 2022 – il di che la Russia ha attatgà l'Ucraina – anc bler pli impurtant.» La Russia pericliteschia cun sia attatga brutala er la segirezza en l'entira Europa.

La Svizra sustegnia e sa tegnia er vi da las sancziuns encunter la Russia, quai saja legraivel. Legraivel saja er il mandat da la Svizra per contractivas cun l'Uniun europeica. Alain Berset ha sincerà davart il tema che neutralitad na muntia en nagins cas indifferenza. La Svizra sustegnia l'Ucraina fin il 2028 cun 1,8 milliardas francs.

Anc uss naginas furniziuns d'armas

Las leschas da neutralitad muntan che la regenza na po betg sustegnair ina u l'autra vart a moda militara. «Ins na po betg pretender che nus violeschian nossas atgnas leschas», ha Berset ditg. Discussiuns davart il tema dettia dentant en Svizra.

Igl è impurtant che nus ans tegnain vi da reglas ed adattain ellas sche necessari.

La Svizra pretenda tar empustaziuns da material da guerra ina garanzia ch'il material na vegn betg dà enavant a partidas che mainan ina guerra. La Germania vul dentant exportar en l'Ucraina muniziun svizra per ils panzers da gepard.

Ina lubientscha spezial per quest cas ha Berna enfin uss refusà. Er sumegliantas dumondas da la Spagna e dal Danemarc ha la regenza refusà. Projects en il parlament en questa chaussa han medemamain fatg naufragi.

RTR novitads 15:00

Artitgels legids il pli savens