Tar in inscunter a Turitg èn vegnids ensemen parlamentaris da la Svizra e da l'Uniun europeica per discutar da las relaziuns in tranter l'auter. L'inscunter haja gidà a localisar ils problems, dentant l'ov da Columbus n'hajan ins betg chattà, ha ditg la Cussegliera naziunala Kathy Riklin.
Surtut saja vegnì discurrì davart la libra circulaziun da persunas, ha ditg Kathy Riklin, la Cussegliera naziunala da la PCD Turitg e manadra da la delegaziun svizra. Decisiuns na hajan ins betg prendì, dentant hajan ins pudì localisar ils problems. Sco quai ch’il manader da la delegaziun da l'UE, Jorn Dohrmann, ha ditg, sajan ins interessads da schliar las dumondas avertas.
