Siglir tar il cuntegn
cuntegn

Svizra Betg tradì secrets

Nagina denunzia penala cunter Christa Markwalder en l'affera da Kasachstan. Quai ha decidì la cumissiun per la politica exteriura dal cussegl naziunal.

La cussegliera naziunala Christa Markwalder
Legenda: Cussegliera naziunala Christa Markwalder na sto betg quintar cun ina denunzia penala. Keystone

Sco quai ch'il president da la cumissiun Carlo Sommaruga ha ditg suenter la seduta, haja la cumissiun decidì cun 18cunter 0 vuschs che la cussegliera naziunala da la PLD n'haja betg cuntrafatg al secret d'uffizi. Il cuntegn dals documents dads vinavant saja gia stà enconuschent.

L'entschatta matg è vegnì enconuschent ch'ina agentura da PR aveva scrit in text d'in'interpellaziun da Markwalder. L'agentura ha scrit il text sin incumbensa d'ina firma dal Kasachstan.

Er davart il biro dal cussegl naziunal naginas sancziuns

Era il biro dal cussegl naziunal desista da sancziuns cunter la liberaldemocratica Christa Markwalder. Quai ha il president Stéphane Rossini ditg al cumenzament da la sessiun dal cussegl naziunal a Berna. Formalmain haja Markwalder bain cuntrafatg al secret d’uffizi, ma i sa tractia d’ina piculezza.

Il biro avess la pussaivladad da prender mesiras disciplinaras.

Grond levgiament

Christa Markwalder sezza ha ditg ch'ella saja zunt levgiada da las discussiuns objectivas. Ella haja emprendì sia lecziun da l'istorgia.

RR novitads 14.00