Il bloc 2 da l’ovra atomara da Beznau è puspè vi da la rait. Quai ha communitgà l’Axpo, la gestiunaria da l’ovra. L’Inspecturat federal da la segirezza nucleara ENSI haja dà la lubientscha.
Durant las ultimas duas emnas era il bloc 2 giud la rait. Quai tenor plan per midar plirs elements da brisch. 20 dals en tut 121 elements èn vegnids remplazzads. Plinavant ha l'Axpo fatg differentas lavurs d'examinaziun, e tests da sistems. Uss saja l'implant puspè pront per in'ulteriura perioda da manaschi.
