Siglir tar il cuntegn
Inhalt

Svizra Billag: dapli cas da suspect sin consum senza concessiun

Dapi il 2012 vegnan adina dapli persunas suspectadas dad avair tralaschà l'obligaziun d'annunziar lur radio u televisiun al post d'incassament Billag. Il 2017 hai dà 2'247 denunzias.

Quint da la Billag.
Legenda: En proporziun na vegn in pitschen dumber betg suenter a sia obligaziun. Keystone

Curt e concis

  • Il dumber da persunas suspectadas da consumar radio u televisiun senza concessiun prenda tiers.
  • Il 2017 hai dà 2'247 denunzias.
  • En proporziun cun il dumber da persunas ch'è obligà d'annunziar ses radio u sia televisiun tar la Billag n'è il dumber betg uschè aut.

Il dumber da persunas che vegnan suspectadas dad avair tralaschà l'obligaziun d'annunziar lur radio u televisiun al post d'incassament Billag prenda tiers – dapi il 2012. Uschia hai dà 2'247 denunzias l'onn passà.

In pitschen cumpart

En proporziun cun il dumber da persunas e manaschis che vegnian suenter a lur obligaziun na saja quai dentant betg in aut dumber, uschia il pledader da la Billag Dominik Müller envers l'agentura da novitads SDA. Totalmain ha la Billag tramess quints en valur da 5,2 milliuns francs.

Denunzià hajan ins surtut persunas e manaschis ch'han annunzià mo in apparat (radio u televisiun) ed en vardad duvrà tuts duas. Ins haja fatg attent ils pertutgads sin lur sbagl, quai saja dentant vegnì ignorà.

Ils 4 da mars vegn il suveran a decider sch'el vul abolir las taxas per radio e televisiun per entschatta 2019 u betg.

RR novitads 16:00