Tgi che ha gia pajà la taxa da radio e televisiun per l'avrigl 2015 survegn enavos ils daners per la taglia sin la plivalur, quai communitgescha l'uffizi federal da communicaziun BAKOM.
L'uffizi realisescha uschia la decisiun dal Tribunal federal dals 13 d'avrigl, che la taxa n'è betg suttamessa a la taglia sin la plivalur. A tals che han gia pajà il quint davent l'avrigl 2015 vegn restituì ils daners. La summa vegn tratg giu dal proxim quint. Il medem vala era per tals che han gia pajà la taxa per ils trais mais avrigl, matg e zercladur.
