Il durmigliet giagl è l'animal da l'onn 2022. Quai ha annunzià la Pro Natura. Il durmigliet giagl saja periclità, perquai che sia populaziun sa reduceschia dapi decennis. Cura che las mieurs vegnian alertas l'avrigl dal sien d'enviern, manchia en Svizra adina dapli guaud selvadi. Uschia appellescha la Pro Natura a la Confederaziun ed als chantuns da stgaffir dapli reservats da guaud.
Populaziun dal ferra mo cun tratgas
Sco pèsch da l'onn ha la Federaziun svizra da pestga elegì il ferra. Er da quel dettia adina pli pauc en Svizra. Blers lais sajan surladads u schmerdads cun chemia, uschia ch'il ferra perdia adina dapli spazi da viver. Entant ch'ins haja ils onns 90 anc pestgà radund 1500 tonnas ferra dals lais svizzers, saja quai stà il 2019 mo anc 486 tonnas. En ils lais da la Bassa possian ins mantegnair la populaziun dal ferra per part mo cun tratgas spezialas. Quai preoccupeschia era pestgaders professiunals, nua ch'il ferra muntia savens il post d'entradas principal.
Lodola da prada perda era spazi da viver
Sco utschè da l'onn ha l'organisaziun BirdLife Svizra elegì la lodola da prada. L'utschè che viva dapi tschientaners en la cuntrada agrara e cumbatta era per surviver. Cun l'industrialisaziun da l'agricultura vegnia era ses spazi da viver pli e pli pitschen. Perquai pretenda BirdLife tranter auter era da s'orientar danov en la politica agrara.
