Siglir tar il cuntegn

Svizra Biodiversitad: il maini dals chantuns è dumandà

Il Cussegl federal consultescha ils chantuns per realisar la strategia da biodiversitad da la Svizra. El ha prendì enconuschientscha da la direcziun, da l' urari sco era da las finanzas necessarias. Ils custs pudessen muntar a fin 210 milliuns francs per onn.

duas libellas verdas sin in traifigl verd
Legenda: Era quests insects (Prachtlibelle, Calopterygidae) dovran ina varietad da la natira per pudair segirar lur existenza. Keystone

Per la fasa da preparaziun fin il 2020 quintan ils experts cun custs annuals da 79 milliuns francs e per la fasa da realisaziun enfin il 2040 cun custs da fin 210 milliuns francs per onn. Quai dentant sulet sch'ils chantuns realiseschan las mesiras proponidas.

Cunquai ch'i sa tracta tar la biodiversitad d'in'incumbensa communabla dessia tar ils chantuns custs supplementars en la medema autezza, quai communitgescha l'Uffizi federal d'ambient. Avant ch'il Cussegl federal decida en chaussa duain perquai ils chantuns survegnir la pussaivladad d'exprimer lur maini tar las mesiras che pertutgan els.

Il plan d'acziun per la strategia da biodiversitad duai gidar da cumbatter la reducziun da la varietad biologica ed uschia la periclitaziun da las basas da viver e dal bainstar.