Siglir tar il cuntegn

Header

Privel da lavinas
Legenda: Privel da lavinas INSTITUT FEDERAL PER LA PERSCRUTAZIUN DA NAIV E LAVINAS (SLF)
cuntegn

Blera naiv e plievgia En parts dal Grischun vala oz in grond privel da lavinas

En parts dal Grischun dal nord, vala oz in privel da lavinas grond, stgalim 4 da 5. Quest privel vala cunzunt per tuttas parts sur 2'200 meters ch'èn exponidas. La blera naiv nova vegn sin ina cuverta da naiv veglia ch'è flaivla. Perquai èn vinavant lavinas spontanas pussaivlas. Quellas pon vegnir fitg grondas. Er singulas persunas pon gia activar fitg tgunsch lavinas. Quai declera l’institut da naiv e lavinas a Tavau.

Er sut 2’200 meters saja da quintar cun bleras lavinas pervi da la plievgia. Uschiglio vala in privel da lavinas considerabel u moderà.

Blera plievgia e privel da bovas

Dapi gievgia hai pluvì en spezial en il nord da las alps, la part sut dal Vallais ed il Giura. Local hai er dà bovas e crudadas da crappa. En las alps hai per part navì la notg sin sonda. Sin il Grond Son Bernard hai dà 49 cm naiv nova. Al Glacier de Saleina en il Vallais perfin 61 cm. Enfin Nadalnotg plovi er anc vinavant.

Ferms vents

Venderdi a bun’ura han furià suffels da stemprà sur la Svizra. Quai ha communitgà il servetsch d’aura Meteonews. Sin il Jungfraujoch hajan ins mesirà spertezzas da vent da passa 130 kilometers l’ura. Sin il Säntis hajan ins mesirà passa 120 kiometers l’ura. En la Bassa hajan ins mesirà passa 80 kilometers l’ura tar la staziun meteorologica da Sankt Chrischona datiers da la citad da Basilea. Pervi dals ferms vents ha communitgà la SBB che nagins trens curseschan oz tranter Appenzell e Wasserauen.

Stadis Unids quintan cun stemprà d'enviern

Betg mo en Svizra, er en ils Stadis Unids èsi da quintar cun capriolas d'aura: Grondas parts dal pajais sa preparan actualmain sin in stemprà d’enviern. Meteorologs averteschan d’in fraid murdent, navaglias ed orcans.

En consequenza han plirs stadis federativs gia proclamà il stadi d’urgenza. Il president american Joe Biden ha appellà a viagiaturs e viagiaturas da sa metter sin via tant pli spert. Silsuenter possia vegnir privlus. I na sa tractia betg dad in normal di da naiv.

audio
Joe Biden: «I vegn serius»
ord RTR Audio dals 23.12.2022.
laschar ir. Durada: 11 Secundas.

En ils Stadis Unids viageschan passa 100 milliuns persunas cun l’auto sur ils dis da festa. Ultra da quai sgolan er blers Americans ed Americanas. Pervi da l’aura èn gievgia gia 2000 sgols vegnids stritgads. Ils proxims dis èsi da quintar ch'ulteriurs sgols ston vegnir annullads.

RTR novitads 06:00

Artitgels legids il pli savens

Scrollar a sanestra Scrollar a dretga