Tgi che fa vacanzas da stad en Svizra è forsa s'imaginà insatge auter tar il pled «stad». Enstagl da crema e parasol, dovri giacca e paraplievgia. Er ils proxims dis na vesi betg ora sco sche l'aura midass. Ma quai n'è nagina raschun da far il mutg. Nus avain rimnà intgins tips, co tuttina passentar in pèr bels dis.
1. Il classicher: leger in cudesch
Tge han ins udì dals geniturs, sch'ins be guardava televisiun l'entir suentermezdi: «Legia ina giada in cudesch». Ma tgenin? Gidar po qua nossa seria da magliacudeschs che preschenta adina puspè novs cudeschs interessants.
E nua chatt'ins cudeschs? Tranter auter en la biblioteca. En Svizra avain nus intginas bellas bibliotecas che rendan ina visita.
2. Ir a kino u ... streamar sin rtr.ch
Sin nossa plattafurma play rtr datti massa contribuziuns, reportaschas e serias da streamar per mintga gust. Insatge datti per mintgin e mintgina da scuvrir.
Noss tips da l'emna:
Da streamar datti er tut ils concerts da l'Open Air Lumnezia, per tgi che n'ha betg gì la chaschun dad ir al lieu. Da tut quai che gira e passa pudais era leger en noss liveticker exclusiv da l'Open Air Lumnezia:
3. Chattar occurenzas rumantschas sin chalender.ch
Il concert da la societad da musica, il teater da l'uniun da giuventetgna, prelecziuns litteraras, la saira da lotto organisada da l'uniun da tir u la bursa da vestgadira d'uffants. Ils termins per tals eveniments ed anc blers auters èn da chattar sin la plattafurma digitala chalender.ch. Sin questa pagina d'internet vegn ensemen l'entira schelta d'occurrenzas rumantschas. Eveniments da tut gener, per pitschen e grond, che han lieu en tut las regiuns dal Grischun, sco er en la diaspora rumantscha.
Il concert da la societad da musica, il teater da l'uniun da giuventetgna, prelecziuns litteraras, la saira da lotto organisada da l'uniun da tir u la bursa da vestgadira d'uffants. Ils termins per tals eveniments ed anc blers auters èn da chattar sin la nova plattafurma digitala chalender.ch
4. Profitar dals schneplis en las muntognas
Bleras turistas e blers turists da l'exteriur èn savens er da viadi da trid'aura. Ils indigens restan lura savens plitost a chasa. Pliras regiuns da muntogna porschan dentant schneplis durant tals dis – chavazzin pretschs dinamics. Cun la dumonda diminuida per bigliets sa sbassa il pretsch per quels. In'egliada sin la pagina correspundenta renda perquai.
E lura datti er in'activitad ch'è schizunt pli interessanta dad aura plitost schleta – il sport sin l'aua. Cun bler vent vai simplamain meglier da surfar u ir a vela.
5. Planisar per megliers temps (pli suleglivs)
Nagin plaschair n'è meglier ch'il plaschair anticipà. Pia pon ins da quels dis er gia far plans per temps pli bels, u schizunt er gia per l'enviern. Actualmain porschan intgins shops online differentas acziuns sin material d'enviern. U tgi che po entschaiver en insumma nagut cun l'enviern, po er gia cudeschar il proxim sgol en ina regiun pli chauda.