A bleras persunas pli veglias mancan ils daners per pajar il tschains da locaziun. Motiv èn las prestaziuns supplementaras che han ina limita. Questa limita n’è betg vegnida adattada dapi il 2001 quai malgrà ch’ils custs da locaziun èn creschids en quest temp per 20%, scriva la Pro Senectute.
Anc da buna possa ma tuttina en la chasa d’attempads
In sguard mussa ch’en ils blers chantuns èn ils custs da locaziun sur las limitas per prestaziuns supplementaras. Uschia ston ils pensiunads pajar la differenza e spargnar en in auter lieu. Era en cas conuschents a la Pro Senectute nua che persunas han stuì entrar en ina chasa d’attempads ord motiv da betg pli pudair pajar il tschains da locaziun.
Soluziun è bloccada a Berna
Tenor la Pro Senectute ha il Cussegl federal gia preschentà il 2014 ina proposta per ina adattaziun da questas limitas. Quel avess cuntegni in auzament da la limita maximala e l’introducziun da contribuziuns differenziadas. La fatschenta è dentant bloccada a Berna. La maioritad da la cumissiun predeliberanta dal Cussegl naziunal vul integrar la midada da lascha gist en la refurma totala da las prestaziun supplementaras.
RR novitads 06:00