Siglir tar il cuntegn

Header

Bancnotas da dollars.
Legenda: Keystone
cuntegn

Bloomberg Billionaires Index Otg superritgs da la Svizra tranter ils 500 pli ritgs dal mund

Ina da quels otg superritgs Svizzers è er la scheffa dal concern EMS-Chemie, Magdalena Martullo-Blocher. Sco pli ritg Svizzer vala Ernesto Bertarelli ensemen cun sia famiglia.

La Svizra n'è betg represchentada sin ils emprims plazs da la glista cun las pli ritgas dal mund. En il pli nov Bloomberg Billionaire Index vegnan dentant numnads otg superritgs Svizzers en la glista dals top 500 dal mund.

La pli gronda facultad en Svizra han l'interprendider da Genevra Ernesto Bertarelli e sia famiglia. Cun ina ina facultad stimada da 20,4 milliardas dollars sa chattan ils Bertarellis sin plaz 92 da la glista da Bloomberg.

Sin plaz 241 suonda Gianluigi Aponte, il possessur dal concern da navigaziun MSC che viva a Genevra. Sia facultad vegn stimada sin 10 milliardas dollars. Il fundatur dal concern medicinal Synthes, Hansjörg Wyss, è cun ina facultad da 9,2 milliardas dollars sin plaz 280.

Duas figlias da Blocher tranter ils superritgs

La cussegliera naziunala e scheffa da concern da la EM-Chemie è cun ina facultad stimada dad 8 milliardas dollars sin plaz 334 da la glista da Bloomberg. La sora da Martullo-Blocher, Rahel Blocher, suonda be curt suenter cun ina facultad da 7,8 milliardas dollars sin plaz 342.

E sin ulteriurs rangs dals superritgs sa chattan ils acziunaris da famiglia dal concern da farmazia Roche. André Hoffmann è cun ina facultad da 6,4 milliardas dollars sin plaz 430. Vera Michalski-Hoffmann e Maja Hoffmann suonda sin plaz 453 e 454. Lur facultad munta mintgamai a 6,1 milliardas dollars.

Bezos avant Arnault e Musk

Sco pli ritg dal mund vala tenor la glista da Bloomberg il schef dad Amazon, Jeff Bezos – quai cun ina facultad da 190 milliardas dollars. Cun ina facultad da 161 milliardas dollars suonda il Franzos Bernard Arnualt dal concern cun products da luxus LVHM. Sa ruschnà sin plaz trais è l'interprendider renumà Elon Musk. Tenor stimaziuns da Bloomberg è la facultad da Musk sa reducida dapi il schaner per 24% sin 161 milliardas dollars.

audio
Per tadlar: Las novitads da las 06:00
05:17 min, RTR Audio dals 18.05.2021.
laschar ir. Durada: 05:17 minutas.

RTR novitads 06:00

Artitgels legids il pli savens

Scrollar a sanestra Scrollar a dretga