Siglir tar il cuntegn
Inhalt

Svizra «Blue My Mind» – il favurit tranter ils films nominads

Mesemna è stada la notg da nominaziun per il Premi da film svizzer. Favurit è il film «Blue My Mind».

Team da «Blue my Mind».
Legenda: Il team da «Blue My Mind» ha motiv da sa legrar – il film è vegnì nominà en set categorias. Keystone

Ils 23 da mars vegn in dals 79 films annunziads premià cun il Premi da film svizzer 2018. La mesemna ha gì lieu la nominaziun. Il favurit è il film «Blue My Mind» ch'è nominà en gist set categorias.

Mintgamai 350 commembers da l'Academia da film svizra han guardà ils films e giuditgà els. Ils resultats da la votaziun valan sco basa per la nominaziun, che vegn lura preschentada da la cumissiun da nominaziun. Las nominaziuns en 12 categorias èn colliadas cun ina summa totala da premis da passa 442'000 francs.

Emna dals nominads

Tut quels che n'han anc betg gì la pussaivladad da guardar pon far quai durant da l'emna da la surdada dal premi. Dals 19 enfin ils 25 da mars mussan ils Cinémas du Grütli a Genevra ed il Podi da film a Turitg ils films nominads per la publicitad.

En mez quell'emna vegn lura surdà il premi. Er Cussegliera federala Simonetta Sommaruga vegn ad esser preschenta en la Halle 622 a Turitg.

RR novitads 07:00