Suenter ils 15 da schaner ha il gremi da la Banca naziunala svizra per l'emprima giada puspè dà pled e fatg davart la situaziun da la politica monetara actuala. Il president da la BNS Thomas Jordan ha communitgà ils fatgs.
Ils fatg centrals:
- politca monetara resta sco enfin qua
- ils tschains negativs sin dabuns da giro restan tar -0,75%.
- tschains da referenza resta tar -1,25 enfin 0,25%
- prognosa per la conjunctura sa sbassa da 2 sin 1%
Reacziuns:
- euro croda sin 1,0575 francs (9:45)
- dollar croda sin 0,991 francs (9:45)
Vinavant activa sin il martgà da devisas
La Banca naziunala svizra ha danovamain confermà ch'ella restia tenor basegn activa sin il martgà da devisas per influenzar las cundiziuns da basa monetaras. Dapi l'aboliziun dal curs minimal ils 15 da schaner n'han ils survegliaders monetars betg pli cumprà devisas per flaivlentar il franc svizzer.
En la situaziun economica actuala na datti nagin'alternativa als tschains negativs.
La BNS sbassa sia prognosa per l'economia sviza da 2 sin 1% per quest onn. La prognosa dal december haja stuì vegnir revedida suenter l'aboliziun dal curs minimal, uschia Jordan. Surtut l'emprim mez onn dal 2015 saja da quintar cun ina clera sminuaziun dal svilup economic.
Nagina deflaziun
Jordan na quinta dentant betg cun ina inflaziun negativa u schiziunt ina spirala da deflaziun. Il ferm franc ed il pretsch d'ieli che saja sa sbassà laschia però per il mument curdar ora negativ l'inflaziun.
Jordan relativescha la situaziun acutala
Per l'economia saja quai ina gronda sfida, uschia Jordan. La situaziun na saja dentant betg da cumparegliar cun quella avant ch'il curs minimal da l'euros è vegnì introducì. Lura avevia l'economia anc da sbatter cun la crisa da finanzas ed il franc eria survalità fermamain. Oz saja la situaziun da conjunctura internaziunala in toc pli avantagiusa.
Gremi da la BNS è sut squitsch
Per declerar la decisiun da la SNB tegna la banca per l'emprima giada ina conferenza la primavaira. Enfin ussa era il dicrectori da la banca sulet sa mussà il zercladur ed il december a la publicitad. Il directori è entant vegnì sut agen squitsch politic. Al gremi vegn rinfatschà ch'el haja ina memia gronda pussanza senza vegnir controllà da la politica.
RR novitads 10:00
