Siglir tar il cuntegn

Header

cuntegn

Svizra Bodycams per ils policists da la citad da Turitg

Ils policists da la citad da Turitg duain definitivamain survegnir bodycams. Il project da pilot haja mussà che quellas cameras hajan in effect da deescalaziun.

La polizia da la citad ha testà las cameras l'onn passà durant 36 emnas. En funcziun han els mintgamai mess la camera, cura ch'i deva in privel dad escalaziun en ina situaziun ubain cura ch'il visavi ha pretendì da metter en funcziun la camera.

Il project da pilot mussia, che talas cameras hajan in effect da deescalaziun. Quai ha la polizia da Turitg communitgà il venderdi. En blers cas saja il visavi gia sa quietà, cura ch'el saja vegnì infurmà da la patruglia, che la camera registreschia.

Evitar attatgas cunter policists

Tenor stimaziuns da la polizia da la citad da Turitg, pudessi dar cun las bodycams fin 50 attatgas damain per onn sin policists da la citad. Ed en il medem mument portian las cameras mussaments supplementars, sch'i vegnia tar ina procedura penala cunter policists participads.

Il cusseglier da la citad Richard Wolff vegn uss a preschentar al Cussegl da citad ina proposta per introducir definitivamain las bodycams per ils policists. Sche quel accepta la proposta, sto il Cussegl communal anc elavurar la basa legala. Ils custs dal project muntan a 200'000 francs l'onn.

RR novitads 12:00

Artitgels legids il pli savens