En ina stanza da tecnica era extrà il mardi gas da clor, uschia ch'il bogn avert ha stuì vegnir evacuà. Radund 700 persunas hajan bandunà l'areal a moda ruassaivla, ha communitgà la polizia. Ils evacuads èn vegnids examinads dals pumpiers e da la sanitad. 12 persunas èn vegnidas ospitalisadas per controlla.
La polizia chantunala da l'Argovia examinescha las raschuns per il cas. Ella vegn sustegnida dals pumpiers sco era da persunas dal fatg or da la branscha da chemia. Entant è il bogn a Bremgarten puspè avert.
RR novitads 11:00