Siglir tar il cuntegn

Header

cuntegn

Boom da sport La Svizra è vegnida pli sportiva ils ultims 6 onns

Ils ultims 6 onns è la Svizra daventada pli sportiva. Surtut dunnas e seniors sa movian dapli. Dentant hajan er la Svizra franzosa e la Svizra taliana pudì recuperar. Er la gruppa da quels che na fan mai sport saja vegnida pli pitschna, quai mussa in studi da l'Uffizi federal da sport.

Cun quai ha il boom da sport cuntinuà sur ils ultims 6 onns. Quai mussa il studi represchentativ da l'Uffizi federal da sport. Al studi èn sa participadas passa 12'000 persunas.

Passa la mesadad da la populaziun a partir da 15 onns, èn da l'avis dad esser persunas fitg activas. Betg be tar il sport, ma er tar l'ulteriur sa cuntegnair sa mussia che la populaziun saja vegnida pli activa: Radund 80% dals creschids adempleschan las recumandaziuns da moviment, vul dir almain duas uras e mez moviment ni sport per emna.

Dunnas e persunas pli veglias fan dapli

Il pli grond svilup è da vesair tar dunnas e persunas en lur segunda fasa da la vita. Dunnas han cun quai reducì la distanza tar ils umens ed èn sur tut a partir da 45 onns fitg intgantadas dal sport. Er in grond augment ha nudà il sport tar seniors.

L'emprima giada dapi ils onns 1970 è la cumpart da persunas che fan nagin sport sa reducida e quai a moda marcanta da 26% sin 16%.

Viandar – ir cun velo – nudar

Il pli sisum sin la glista dals sports preferids saja sco er en autras retschertgas l'uschenumnà «decatlon helvetic» cun las disciplinas viandar, ir cun velo, nudar, ir cun skis e currer. Il viandar ha anc ina giada pudì gudagnar dapi l'ultim studi dal 2014. Tar tut las schlattas e gruppas da vegliadetgna è quai il sport che vegn fatg il pli savens.

Campiun europeic

Er en la cumparegliaziun europeica è la Svizra fitg sportiva e tutga suenter la Finlanda e la Svezia tar ils pajais ils pli sportivs. Tar las persunas che fan almain ina giada l'emna sport, è la Svizra cun 59% perfin a la testa europeica.

audio
Per tadlar curt e cumpact
ord RTR Audio dals 08.06.2020.
laschar ir. Durada: 1 minuta 3 Secundas.

RTR novitads 12:00

Artitgels legids il pli savens