Durant la pandemia da corona hai dà in veritabel boom dad operaziuns plasticas. Quai rapporta il «SonntagsBlick». Uss sa mussia dentant la vart pauc bella da quest svilup. Ils ospitals svizzers nodian in ferm augment da cumplicaziuns en connex cun talas operaziuns cosmeticas. L’Inselspital a Berna tractia mintg’onn radund 20 persunas pervi dad operaziuns plasticas che na sajan betg gartegiadas. L’ospital universitar da Basilea discurria da 20 fin 30 cas e l’ospital universitar da Turitg schizunt da 50 fin 60 cas ad onn.
Assicuranza da basa sto surpigliar custs
Cunquai ch’il dumber d’unfrendas da talas operaziuns malgartegiadas creschia, s’augmentian er ils custs da sanadad. A Berna per exempel custia il tractament en connex cun cumplicaziuns suenter operaziuns plasticas tranter 10'000 e 20'000 francs per persuna tractada. Quests custs surpiglia l’assicuranza da basa.
