Ils 17 da november 1948, pia exact avant 75 onns – è s'averta a Kloten ina gronda porta envers il mund pli lontan. Lura è stada l'inauguraziun dal nov eroport, en preschientscha da l'entira regenza turitgaisa, blers auters giasts e las medias. Uschia è l'entir manaschi aviatic civil stà dischlocà da Dübendorf a Kloten.
Gia la stad 1948 era la pista vest pronta
La stad ha la Schweizer Filmwochenschau, las novitads ch'eran da vesair regularmain en ils kinos svizzers – rapportà da l'emprima pista ch'è stada pronta per il traffic aviatic. Ils 14 da zercladur è l'emprima maschina sgulada da Kloten a Londra, in aviun dal tip Douglas DC-4 da la Swissair.
E blers onns èn quels sgols davent da Kloten restads ina chaussa exclusiva per in circul da persunas pli pitschen. Ed era sche l'eroport è creschì spert, eran las cifras anc ils onns 1970 lunsch davent da las dimensiuns imposantas dad ozendi.
L'aventura gronda dals uffants da Sent
L'onn 1983 ha la scola secundara da Sent gì la chaschun da visitar l'eroport da Kloten. Las scolaras ed ils scolars han tranter auter pudì vesair, co il persunal da la tur da controlla lavurava. Ed els han gì access al cockpit d'in aviun Jumbo Jet. Ed a la fin ha spetgà in sgol cun dus pitschens aviuns sur la regiun da Turitg.
La passiun da la flight attendant Maya Bazzell
Fitg giuvna ha Maya Bazzell fatg la scolaziun da hostess. Suenter lavurar sin divers mastergns, è l'Engiadinaisa puspè turnada il 1984 tar il sgular. Ed il matg 1985 ha la Televisiun Rumantscha lura dastgà accumpagnar Maya Bazzell durant sia lavur tar la Swissair. Quai sin sgol da Turitg a Genevra, e lura vinavant a New York.
«Tranter Tschiel e Terra»
Il 2013 ha RTR realisà la seria «Tranter Tschiel e Terra» nua ch'i va per la lavur da trais Rumantschs a la plazza aviatica da Kloten: l'incumbensà per la segirezza dal persunal a terra Pio Steffen, guardia aviatica Simon Jäger e pilot Marc Albrecht.
20 onns dapi il grounding da la Swissair
Da Martin Wetten da Luven avevan nus rapportà suenter ch'el è vegnì pensiunà il 2021. El ha mussà losch sia unifurma blaua da Maitre de cabine.
Grondas midadas durant la pandemia da corona
In temp nua ch'i ha midà bler a la plazza aviatica Turitg era la pandemia. Da quest temp ha Flavia Huder da Samedan lavurà sco flight attendant.
