Siglir tar il cuntegn

Header

cuntegn

Branscha da medias Sustegn finanzial è sin buna via

La branscha da medias ch’ha da sbatter dapi onns spera da survegnir daners da la Confederaziun. Il mument èn las schanzas uschè bunas sco anc mai.

Il Cussegl dals chantuns ha decis oz en favur dals editurs da gasettas. Per exempel duai la Confederaziun sustegnair finanzialmain la distribuziun da gasettas. Gia dapi onns pateschan gasettas, emetturs da radio e televisiun da la mancanza d’entradas da reclama. Ina schleppa hai dentant dà per las medias online.

Da principi sustegn la chombra pitschna il sustegn er per medias online. Perquai ch'il Cussegl dals chantuns n'ha dentant betg schlià il frain a las expensas per la sparta è il sustegn giud maisa. I na dat nagins daners per las medias online – previs eran 30 milliuns francs ad onn.

Ina pitschna maioritad dal center e la sanestra aveva gia approvà la basa legala per il sustegn da las medias online. Il concept dal Cussegl federal saja equilibrà, uschia il tenor.

L'ultim pled n'è dentant anc betg crudà

Omaduas varts, adversaris e aderents dal sustegn per meds da massa online, han cuntanschì ina victoria parziala. La decisiun finala n'è anc betg crudada. Sch'il Cussegl naziunal di gea a la basa legala e schlia en il mument temp il frain a las expensas, pudessan las medias online tuttina profitar da daners da la Confederaziun.

Quai dentant be sch'il Cussegl dals chantuns approvas la decisiun. Per gliez dovri dentant quella giada ina maioritad da 24 vuschs. La gievgia ha il sustegn anc survegnì 22 vuschs - duas mancan pia anc. Sco proxim tracta la cumissiun per traffic e communicaziun dal Cussegl naziunal la fatschenta.

audio
Per tadlar: Las novitads da las 18:00
ord Novitads dals 18.06.2020. Maletg: RTR
laschar ir. Durada: 5 minutas 40 Secundas.

RTR novitads 17:00

Artitgels legids il pli savens