Siglir tar il cuntegn

Svizra Brexit: Burkhalter spetga pragmatissem

Dapli pragmatissem en las tractativas cun l'UE, dentant consequenzas negativas per l'economia: quai èn tenor ils cussegliers federals Didier Burkhalter e Johann Schneider-Ammann las consequenzas dal Brexit per la Svizra. L'avegnir da las tractativas cun l’UE occupa era las partidas svizras.

Burkhalter a Brüssel sin via.
Legenda: Cusseglier federal Didier Burkhalter, qua tar ina visita quest onn a Brüssel, è d'avis ch'i sa midi pauc en las relaziuns tranter la Svizra e l'UE. Keystone

Areguard ina cunvegna davart la circulaziun libra da persunas na saja la posiziun da la Svizra betg vegnida mendra suenter il Brexit. Questa situaziun avria era las pussaivladads da discutar pli pragmatic, co reglar la relaziuns tranter l'UE ed ils stadis terzs, ha Didier Burkhalter ditg.

Schneider-Ammann.
Legenda: Il president da la Confederaziun Johann Schneider-Ammann explichescha las consequenzas per la Svizra. Keystone

Las partidas svizras davart las tractativas cun l'UE

Fertant ch’il Cussegl federal sa stentia tenor Schneider-Ammann da cuntinuar las tractativas cun l’UE pretenda la PPS dal Cussegl federal, da finir immediatamain mintga tractativa enstagl da s’adattar adina pli ferm a l’UE.

La PLD è dal medem avis sco ses Cusseglier federal Schneider-Ammann che quai vegnia ad esser uss difficil da posiziunar a Brüssel cun giavischs da la Svizra davart la libra circulaziun da persunas e la realisaziun da l’iniziativa d’immigraziun da massa.

Perquai pretenda la sanestra cun la PS che la libra circulaziun da persunas vegnia segirada cun preschentar ina cuntraproposta a l’iniziativa RASA. Mo uschia possian vegnir segirads ils contracts bilaterals.

Malsegirtad davart il svilup economic crescha

Plinavant saja da quintar tenor Schneider-Ammann ch'il Brexit rinforzia anc ina giada la malsegirtad davart il svilup economic. L’economia d’export svizra vegn era a stuair s’adattar a la situaziun nova, sco era il turissem. In ferm franc svizzer è surtut per il turissem ina nauscha novitad.

Curs dal franc svizzer en il center da l’interess

Il Cussegl federal observia cuntinuadamain il svilup dal curs dal franc. Cun quai che la Banca naziunala svizra è responsabla per in stabil curs dal franc svizzer, na s’exprimia il Cussegl federal dentant betg en chaussa.

Il franc svizzer è savens en temps malsegirs ina valuta che vegn duvrada sco «port segir» quai ch’è gia capità.

Helpline per dumondas

La Confederaziun ha endrizzà ina lingia da telefon per dumondas en connex cun il Brexit. Uschia survegnan burgais svizzers e interpresas scleriment sur da pussaivlas consequenzas. Il numer da telefon munta a 0800 24-7-365.

RR novitads 11:00+