Siglir tar il cuntegn
cuntegn

Svizra Brig e Wil fan viva

Per las duas novas cusseglieras federalas vegn fatg festa en lur patria. Ils chantuns fastagian cun lur cusseglieras federalas novas: cun Viola Amherd en il Vallais e cun Karin Keller-Sutter en il Son Gagl.

Wil fa viva cun Karin-Keller Sutter

La gievgia suentermezdi vegn fatg festa a Son Gagl ed a Wil cun la nova cussegliera federala Karin-Keller Sutter. A Son Gagl hai dà in bainvegni en la Lokremise. Cun vin chaud, café e petta ha er la populaziun pudì far in viva cun Karin Keller-Sutter. Per ils pleds festivs han procurà il president da la regenza da Son Gagl Stefan Kölliker sco era il cusseglier federal Johann Schneider-Ammann.

Silsuenter èn ils giasts ids cun il tren a Wil. La saira baud cumenzan las festivitads cun in til da la staziun vers la citad veglia. Sin il plaz da la curt vegn lura fatg in apero per la populaziun, la cussegliera federala e giasts.

Brig fa viva cun Viola Amherd

Viola Amherd va cun in tren spezial via il Vallais Sut a Brig. Ina prima fermada è planisada a Saint-Maurice. Lura viagia la raspada da festa vinavant, en la stretga patria da la nova cussegliera federala vallesana

La festa uffiziala cumenza cun ina gronda retschavida a Brig. Var 1'200 scolaras e scolars e tschients da giasts vegnan a beneventar lur cussegliera federala vallesana. Il banchet da festa ha lieu en la halla da Simplon.

RR actualitad 17:00