Siglir tar il cuntegn

Svizra Bristen puspè accessibel

Suenter ch'ina bova ha destruì la via tranter Amsteg e Bristen è il vitg dal chantun Uri puspè accessibel cun la funiculara veglia.

Ins vesa il carr brin da lain da la funiculara veglia dad Amsteg a Bristen.
Legenda: Funiculara dad Amsteg a Bristen. Keystone

La regenza dal chantun Uri ha oz mardi dà la concessiun da danovamain metter en funcziun la funiculara veglia per segirar l’accessibladad dal vitg da Bristen. Sco il cussegl guvernativ dal chantun Uri ha communitgà han tut ils tests tecnics vid la funiculara gì resultats positivs.

La funiculara vegn ad esser en funcziun mintgamai a partir da las 04:00 enfin las 00:30. Per viadi pon vegnir transportadas 20 persunas. Il transport da persunas indigenas haja prioritad.

Sgols da helicopter mo pli en cas d'urgenza

Ins vesa la bova che ha destruì la via tranter Amsteg e Bristen.
Legenda: Bova tranter Amsteg e Bristen. Keystone

La dumengia dals 5 da mars aveva ina bova destruì la via tranter Amsteg e Bristen. La funiculara remplazza la punt aviatica che l’armada veva endrizzà. Sgols da helicopter vegnan mo pli lubids en cas d’urgenza.

La funiculara cun ina lunghezza da 400 meters era vegnida construida 1920 da las ovras electricas da Bristen. Gia il 2003 era Bristen stà accessibel durant 3 mais sulettamain cun questa funiculara.

RR novitads 12:00