Svizra - Brunner vul ir cun 3 candidats en l’elecziun dal Cussegl federal
Il president da la PPS svizra, Toni Brunner, vul ir cun 3 candidats en l'elecziun dal Cussegl federal. El beneventa la candidatura dal politicher da la Lega, Norman Gobbi. Il Tessinais Gobbi politiseschia dal tuttafatg sin la lingia da la PPS.
En ina intervista cun la SonntagsZeitung ha Brunner ditg: «I faschess senn dad ir cun 3 candidats en l'elecziun - in ord da mintga regiun linguistica». El sez na vegnia betg a candidar. Er Peter Spuhler na vegnia betg a candidar per in sez en il Cussegl federal, uschia Brunner en intervista cun il «SonntagsBlick».
