A Buchs en il chantun Argovia ha in bab probabel mazzà ses trais uffants e lura fatg suicidi. Las quatter baras èn vegnidas chattadas il glindesdi la damaun en ina chasa d'ina famiglia. Tenor la polizia chantunala dad Argovia eran ils trais uffants 3, 11 e 13 onns vegls. Tar il delinquent supponì sa tractia dal bab da 37 onns dals trais uffants. Davart il motiv e l'andament da l'act na fa la polizia il mument naginas indicaziuns.
La damaun las 07:15 saja la polizia vegnida infurmada d'ina terza persuna ch'ins haja chattà en ina chasa d'ina famiglia quatter persunas mortas. Gia baud ha la polizia supponì ch'il delinquent saja tranter las quatter persunas.
La procura publica Lenzburg-Aarau ha avert ina procedura penala. La chasa d'ina famiglia sa chatta en in quartier ruassaivel datiers da la staziun da Buchs, ina vischnanca vischina da Aarau.