Siglir tar il cuntegn

Header

cuntegn

Budget da perchasa 1'589 francs – quai vegn spargnà per mais en perchasas svizzers

1'589 francs – questa summa ha in perchasa svizzer pudì spargnar mintga mais, quai èn 15% da las entradas bruttas. L’Uffizi federal da statistica ha calculà questas cifras per l’onn 2018.

Perchasas da las classas d'entradas pli bassas – cun pli pauc che 5'000 francs entradas bruttas per mais – han pudì metter da la vart nagut u han duvrà dapli daners che quai ch'els han gudagnà. Tenor l'Uffizi federal da statistica sajan quai savens perchasas da persunas pensiunadas che vivan da lur facultad.

2,16 persunas per perchasa

En media han 2,16 persunas vivì il 2018 en in perchasa. Per mais ha quest perchasa gì a disposiziun 7'069 francs. Questa summa sa cumpona da las entradas bruttas da tuttas persunas che abitan en in perchasa, minus las expensas obligatoricas – sco taglia, premias d’AVS e cassas da malsauns.

60% dals perchasas han dentant gì a disposiziun pli paucs daners che la media, scriva l'uffizi. La pli gronda part da las expensas han ils Svizzers dà or per l'abitar e per l'energia. 14,4% da las entradas bruttas, u 1'456 francs èn vegnids dads or en quest sectur.

Dapli per cassa da malsauns che per mangiativas

Per mangiativas e bavrondas betg alcoholicas ha in perchasa dà or il mais 643 francs. 6,3% da las entradas bruttas. 5,8% èn ids a la gastronomia, 1,9% per vestgadira e chalzers. Sin il traffic èn crudads 7,4% u 753 francs. Per cultura e per sa revegnir han ils Svizzers dà or en media 5,4% da las entradas bruttas. Per segiradas e taxas 5,6%

655 francs u 6,5% han da las entradas bruttas èn idas a las cassas da malsauns, per l'assicuranza fundamentala. Tenor la statistica ha la cassa da malsauns obligatorica pia custà il 2018 dapli che mangiativas e bavrondas.

audio
Per tadlar: Las novitads da las 12:00
ord RTR Audio dals 23.11.2020.
laschar ir. Durada: 5 minutas 14 Secundas.

RTR novitads 11:00

Artitgels legids il pli savens