- Grazia a las entradas da taglia da stimà 1,8 milliardas francs, desista il Cussegl federal per l'auter onn d'ulteriurs pachets da spargn.
- Era per ils onns suenter il 2027 saja la prognosa megliera che fin ussa pensà, ha la ministra da las finanzas, Karin Keller-Sutter, ditg envers las medias a Berna.
- Tuttina restia il «program da distgargia 2027–2029».
Per l'onn 2027 na dovria naginas ulteriuras scursaniziuns dal budget da stadi, scriva il Cussegl federal. El quintia numnadamain cun entradas ch'èn 1,8 milliardas sur las stimaziuns dal favrer.
Gia durant la sessiun da stad aveva la ministra da las finanzas, Karin Keller-Sutter, ditg en il parlament che cunzunt interpresas dals chantuns Lucerna, Turitg e Basilea-Citad vegnian a pajar dapli taglia. Quai pertutgia «en spezial interpresas da la branscha da farmazia».
L'avrigl aveva la regenza gia annunzià ch'i dettia ulteriuras scursanidas da 540 milliuns francs. Decis quellas scursanidas aveva la regenza suenter ch'il parlament aveva la finala deliberà in plan da distgargiar pli pauc sever ch'oriundamain pensà. Ma cunquai ch'il resultat dal budget da stadi per il 2027 è ussa «bler meglier» che previs possian ins desister da quellas mesiras annunziadas, scriva il Cussegl federal en ina communicaziun. Motiv per questa valitaziun pli optimistica saja che las prognosas per la taglia sin il gudogn èn vegnidas curregidas cunter ensi.
Restar attent malgrà las cifras positivas
Grazia a questa perspectiva meglierada haja il Cussegl federal tenor la communicaziun dapli spazi d'agir finanzialmain, cunzunt per rinforzar la defensiun militara. Plinavant sajan, per l'emprima giada dapi set onns, previsas naginas expensas extraordinarias per il budget da l'onn 2027.
Senza il pachet da distgargia avess il preventiv per il 2027 in defizit structural da radund 1,3 milliardas francs, scriva il Cussegl federal. En pli mussian las rundas da spargn pli rigurusas dals onns 2024 e 2025 er a vista mesauna anc in effect.
Era per ils onns 2028 fin 2030 annunzia il Cussegl federal meglieras perspectivas finanzialas. Cunquai ch'i vegn spetgà dapli entradas, na stoppia la taglia sin la plivalur a favur da l'armada betg vegnir augmentada uschè fitg sco quai ch'ins aveva proponì en la consultaziun.
Tuttina admonescha il Cussegl federal da betg esser memia optimistic: las perspectivas finanzialas sajan vinavant colliadas cun malsegirezzas considerablas. Uschia saja per exempel intschert, quant ditg che quest trend d'entradas da taglia sin il gudogn pli autas cuzzia anc. Ed era las entradas da la taglia supplementara OECD possian ins actualmain mo giuditgar cun gronda intschertezza.
Plinavant procuria era l'ambient internaziunal per tscherts ristgs, scriva il Cussegl federal. Las tensiuns geopoliticas ed il svilup economic malsegir pudessian er avair consequenzas per las entradas u extradas da la Confederaziun.