Siglir tar il cuntegn

Svizra «Bündner Bergkäse» n'è nagina denominaziun d'origin protegida

L’organisaziun da sorts, «Bündner Käse» ch’aveva vulì questa denominaziun per sasezza ha pers davant il Tribunal administrativ federal. Ella n'è betg represchentativa en il Grischun per la producziun da chaschiel.

Purtret dal logo da Bündnerkäse.
Legenda: «Bündner Bergkäse» n'è betg ina denominaziun d'origin protegida. Keystone

Tenor la sentenzia dal tribunal saja l'organisaziun «Bündner Käse» ils onns 2009 e 2010 stada represchentativa quai che pertutga il dumber da producents da latg. Quai che pertutga la massa da producziun sco era il dumber da chascharias na sajan las premissas dentant betg ademplidas.

Damai che las premissas ston esser ademplidas a moda cumulativa, è il tribunal administrativ federal suandà l'instanza precedenta. El ha renvià in recurs da l'organisaziun. L'instanza precedenta, l'Uffizi federal per l'agricultura aveva sco emprim lubì la denominaziun d'origin protegida.

Decisiun en senn da l'Uffizi federal

Suenter che 14 recurs èn vegnids inoltrads da producents da chaschiel è l'uffizi federal anc ina giada ì sur ils cudeschs. El è vegnì tar la conclusiun che l'organisaziun n'aveva betg demussà lur represchentativitad pertutgant la massa da producziun sco era il dumber da chascharias.

L'organisaziun ha lura dà en in recurs al tribunal administrativ federal. Quel ha ussa decidì en il senn da l'Uffizi federal per agricultura.

RR novitads 17:00