La controlla da finanzas federala attestescha a l'Uffizi federal per edifizis e logistica UFEL d'avair ina buna politica da cumpra. Ella crititgescha dentant ils contracts da furniziun d’electricitad tranter la Confederaziun ed ils furniturs.
Ils contracts hajan memia gronda influenza, uschia scriva la controlla. L'UFEL stoppia surpigliar la direcziun ed en l'avegnir elavurar in contract da muster.
Dapi il 2013 ha l'uffizi cumprà electricitad per 17 milliuns francs. Quai correspunda a 90 % da l'electricitad per tuttas immobiglias da l'UFEL. L'electricitad è ord forza idraulica e deriva per gronda part da la Svizra.
