Siglir tar il cuntegn
cuntegn

Svizra Bun cumenzament per la Canorta Rumantscha a Turitg

Fin il schaner 2017 duai la canorta esser occupada dal tut. Quai muntass tenor il president da l'uniun Remo Pfister, 11 uffants che vegnissan pertgirads da trais educaturas.

Legenda: Guardar il video Canorta Rumantscha a Turitg. Durada 02:52 minutas.
Or da Telesguard dals 20.09.2016.

Actualmain van set uffants mintgamai glindesdi da las 7:30 uras fin a las 18:00 en la canorta. A l'uniun purtadra sa participeschan actualmain 20 commembers e commembras cun ragischs rumantschas.

Tuttina anc blera lavur

Sco il president Remo Pfister ha ditg envers RTR haja el trais finamiras per l'avegnir. D'ina vart veglia el emplenir la glista da spetga per plazs en la canorta per ch'i dettia er novs uffants suenter ch'ils emprims giajan a scoletta. Da l'autra vart vul Remo Pfister er pudair surdar il timun da l'uniun a geniturs pli giuvens. E sco terza finamira schlargiass el gugent la purschida sin ulteriurs dis da l'emna.

Finanziaziun difficila

Il mument ston ils geniturs pajar tut sezs. Quai munta 125 francs per di per in uffant pitschen e 145 francs per in poppin. La citad da Turitg sustegna mo purschidas da lingua tudestga. Tuttina guarda Remo Pfister optimistic en l'avegnir, perquai ch'el è da l'avis che la chaussa avess er d'interessar tant il chantun Grischun sco er la Confederaziun. I giaja gea er per il mantegniment da la quarta lingua svizra. Cun in schlargiament da la purschida sin ulteriurs dis da l'emna vul Pfister er garantir la finanziaziun. Uschia na stuess l'uniun betg metter a disposiziun mintg'onn daners u dar garanzias da deficit.

RR actualitad 11:00