Per il pass da cumplettaziun 2019 pretenda la cumissiun 3,267 milliardas francs. Quai è ina milliarda dapli ch’il Cussegl federal pretenda. La decisiun saja crudada cun 18 cunter 2 vuschs tar 3 abstenziuns. Quai han communitgà ils Servetschs dal parlament.
Il Cussegl federal vul finanziar cun ils daners ils sviaments da Lucerna e da Le Locle el chantun Neuchâtel. Plinavant duain las colliaziuns a Crissier en il Vad vegnir optimadas per dar meglier dumogn al traffic.
Sper quels projects vul ussa la cumissiun da traffic da la chombra gronda era anc integrar en il program il sviament da La-Chaux-de-Fonds el chantun Neuchâtel e da Näfels en Glaruna. Quels dus projects da sviament sajan gia stads decidì cun il fondo per las vias naziunalas ed il traffic en l'aglomeraziun, argumentescha ina clera maioritad la decisiun da la cumissiun. I saja perquai impurtant da tegnair ses pled.
Ch'ils dus projects èn necessaris, da quai maini è era il Cussegl federal. El vul dentant spustar els e realisar omadus enfin l’onn 2030. Sco proxim decida il Cussegl naziunal.
RR novitads 17:00
