Siglir tar il cuntegn
Inhalt

Svizra Bunamain 50 milliuns per agid da svilup

La Svizra vul meglierar l’infrastructura da pajais en svilup da l’Africa e l’Asia. Per ils onns 2017 fin il 2021 ha il Cussegl federal concedì ina contribuziun da 46,5 milliuns francs.

Ina matta lava ils mauns en in pajais da svilup.
Legenda: Projects da provediment d'aua ed electricitad duain vegnir sustegnids. Keystone

In’infrastructura persistenta saja necessaria per ch’in pajais possia sa sviluppar a moda economica, sociala ed ecologica. Uschia argumentescha il Cussegl federal sia decisiun. Cun ils daners duain vegnir sustegnidas tranter auter investiziuns privas en l’infrastructura. Talas investiziuns stgaffeschian er plazzas da lavur.

Pussibilitar il pli necessari

Enfin oz ha organisaziun da svilup «Private Infrastructure Development Group (PIDG)» che survegn ils daners, pussibilità a varga 220 milliuns carstgauns in meglier access tar infrastructura da basa sco electricitad. Plinavant han ellas creà 270’000 plazzas da lavur. Quai scriva il Departament d’economia. L'organisaziun da svilup PIDG vegn purtada da l'Australia, la Germania, la Grond Britannia, ils Pajais Bass, la Svezia, la Svizra sco era la banca mundiala. Il Secretariat da stadi per l'economia è in commember da fundaziun.

RR novitads 18:00