Il pli impurtant en curt
- En la notg sin mesemna vegn il stemprà Burglind a cuntanscher la Svizra
- Ils meteorologs spetgan che Burglind vegn a cuntanscher ses punct culminant la dumengia damaun
- Ils meteorologs quintan cun sveltezzas da vent tranter 80 e 110 kilometers l'ura en la planira
Mesemna datti in di burascus en Svira. Il stemprà «Burglind» procura a partir da questa notg per vents cun spertadad d'orcan – tranter 80 fin 100 kilometers l'ura. Quai cunzunt en il nord da las Alps. Il pli burascus pudessi vegnir en il Giura e sin il Säntis. Qua quintan ils meterologs cun spertadads da vent da fin 180 km/h.
Pervia dal stemprà Burglind han pliras polizias chantunalas formulà reglas da cumportament. Els cusseglian da betg ir al guaud e da liar chaussas moviblas. Mobiglia dad iert, trampolins e containers da rument duain ins salvar en in lieu segirà u liar. Plinavant duain ins segirar puntanadas e barricadas ch'èn sensiblas sin vent.
La previsiun dal privel da lavinas da l'Institut da perscrutaziun da naiv e lavinas SLF a Tavau.
Grischun para da mitschar cun in egl blau
Bufs e suffels ferms vegn a dar en il Grischun pir il suentermezdi. Surtut en il Signuradi vegni a pudair dar vent da fin 100 kilometers l'ura. Uschiglio sajan las valladas grischunas protegidas bain dal vent tras las muntognas, di Felix Blumer dad SRF Meteo.
Grond privel da lavinas
En la regiun alpina è il privel da lavinas per il mument «considerabel» – vul dir stgalim trais da tschintg. Il stemprà pudess far mender la situaziun.
Dapi l'entschatta da l'onn hai gia dà trais accidents da lavinas en il Grischun ed a Berna – cun in morts e plirs blessads.
RR novitads 18:00