«Nus essan en led per Peter Freiburghaus» scriva il teater Duo Fischbach oz sin sia pagina d’internet. Il comicher bernais Peter Freiburghaus è mort cun 75 onns. Enconuschent è el vegnì cun il duo Fischbach. Quel ha el furmà il 1991 ensemen cun sia partenaria Antonia Limacher. Il 1997 è il Duo Fischbach vegnì onurà cun il «Prix Walo» en la categoria cabaret / art pitschen.
Il 2017 aveva il Duo Fischbach stuì annullar la turnea «Endspurt» pervi dad ina diagnosa da cancer da la pel tar Peter Freiburghaus.