Siglir tar il cuntegn

Svizra Calida focussescha sin commerzi online

Il concern da vestgadira «Calida» ha pudì augmentar il gudogn l’emprima mesadad da quest onn marcantamain. Ins haja lavurà pli effizient e profità da unics effects da taglia. La svieuta è però sa reducida.

Spatlains da Calida pendì si cun camischas vidlonder.
Legenda: Calida fa l'emprim semester dapli gudogn. Keystone

Il producent svizzer da vestgadira e biancaria Calida ha augmentà il gudogn da manaschi l’emprim semester per 18,3% sin 5,8 milliuns francs. Il gudogn net è schizunt creschì per 70,8% sin 5,9 milliuns francs. Sco quai che Calida ha communitgà, sajan las raschuns per quai tranter auter effects positivs d’impostas e stimaziuns da posiziuns da valutas estras.

La svieuta netta saja sa diminuida tranter schaner e zercladur, numnadamain per 1,9% sin bunamain 177 milliuns francs. Sa cumprovà saja il focus sin il commerzi online, scriva Calida. La part da las venditas online saja l’emprim semester s’augmentà da 3,6% sin 7,1%. Ultra da quai ha la gruppa Calida l’entschatta mars surpiglià l’interpresa tudestga Reich Online Services per rinforzar quai sectur da fatschenta.

RR novitads 14:00