Siglir tar il cuntegn

Header

cuntegn

Svizra California: Bunamain 1'000 persunas valan sco sparidas

Suenter l'incendi da guaud desastrus en il nord da la California valan anc 993 persunas sco sparidas. La glista da persunas betg chattadas vegnia actualisada cuntinuadamain, ha ditg il scherif responsabel il venderdi saira.

En connex cun l’incendi da guaud en il nord da la California è il dumber da las persunas sparidas sa reducì da 1200 sin 993. Quai rapportan medias localas. Avant intgins dis era la polizia ida da quai or ch'i dettia 200 persunas sparidas ed anc la gievgia valevan 631 persunas sco sparidas. Tenor il scherif sa tractia dad ina glista provisorica. I saja bain pussaivel che persunas sajan vegnidas annunziadas pliras giadas sco sparidas.

Fin uss èn mortas passa 77 persunas en las flommas. Passa 10'000 chasas èn arsas. Tenor indicaziuns da la polizia sajan arsas stgars 57'000 hectaras terren en il nord da la California ed ulteriuras 40'000 hectaras en la vischinanza da Malibu. I sa tracta da l’incendi il pli desastrus en l’istorgia da la California.

President Trump vul oz visitar la regiun da catastrofa. Detagls davart sia visita n'èn entant anc betg enconuschents.

RR novitads 10:00+

Artitgels legids il pli savens