Campagna BfU «See you» – vesair e vegnir vesì

Ils dis vegnan pli curts e las notgs pli lungas. Ils 3 da november 2016 è perquai en Svizra il «Di da la glisch». En l'entira Svizra datti occurrenzas dals posts da polizia. La mira: sensibilisar la glieud d'esser meglier visibel. Oravant tut en il traffic ha quai ina gronda impurtanza.

Dunna sin la via durant ch'i plova ed è stgir. Bild in Lightbox öffnen.

Legenda da maletgs: Senza reflecturs En il stgir èn ins relativ mal visibel. La campagna« See You» ha la mira da midar quai. Keystone

I è capità spert. Ins va cura cun auto cura ch'i è stgir e sto franar andetgamain, perquai ch’in um vestgì en nair passa davant l’auto. Bunamain avess ins tutgà el. Per evitar tals cas, ha il post per la prevenziun d’accidents BfU fundà avant bunamain 32 onns ina gruppa da lavur cun num «segirezza tras vesaivladad».

Questa gruppa ha lantschà la campagna «See you». La mira: Sensibilisar la glieud d'esser meglier visibel en il stgir. Quai fan els cun placats, cun occurrenzas d’infurmaziun en scolas ed affars ed era cun il «di da la glisch». L’actuala miss Svizra Lauriane Sallin è ambassadura per la campagna.

Purtai reflecturs

Il pli grond giavisch ch’els han a la glieud è, da purtar en il stgir materials che reflecteschan la glisch. Cun tals reflecturs èsi pussibel da vegnir vesì sin ina distanza da 140 meters. Sco congual: Cun vestgids clers èn ins visibels sin ina distanza da be 40 meters, cun vestgids stgirs be anc sin 25 meters. Per franar è quai per il solit memia pauc.

Tge pon ins far per esser visibel?

Per ils organisaturs da la campagna «See you» è la campagna in grond success. Adina dapli glieud guardan dad esser visibel sin via, ed era l’industria da moda utilisescha adina dapli materials che reflecteschan la glisch. Uschia datti ozendi betg mo bindels e vestas, ma era schlingias, chapitschas, bratschlets ed ureglins che reflecteschan la glisch. I dat dimena bleras vias, per sa proteger en il stgir.

En il Grischun guarda la polizia en occasiun dal «di da la glisch» in pau pli bain sin reflecturs e glischs vi da vehichels e persunas. In u l’auter tip han els segir er pront.

RR actualitad 07:00