Radund mintga segunda persuna dumandada ha suenter ina visita dal medi l'impressiun da betg avair chapì tut quai ch'il medi u la media ha ditg. Medemamain radund la mesadad dals dumandads ha il sentiment, ch'el u enconuschents hajan gia survegnì in tractament medicinal che n'avess betg fatg da basegn u schizunt in tractament sbaglià.
Per l'uniun Smarter Medicine èsi cun quels resultats cler, ch'i dat in sur-provediment medicinal en Svizra. L'uniun vul perquai sensibilisar il pievel per quest tema cun ina campagna d'infurmaziun. En spezial duai la communicaziun tranter il persunal medicinal ed ils pazients vegnir meglierada. Per quest intent ha l'uniun laschà translatar directivas che sa drizzan a persunal dal fatg en in linguatg da laics. Finamira saja, che medis possian discurrer cun pazients uschia, che quels chapeschian e ch'il pazient saja abel da cundecider davart terapias adequatas.
RR novitads 16:00