Siglir tar il cuntegn

Header

cuntegn

Campagna da Svizra Turissem Enavos en la natira – dentant cun confort e telefonin

Il viandar stat en il center da la campagna da stad da Svizra Turissem.

Tenor in studi che Svizra Turissem ha laschà far è il viandar fitg apprezià per cumpensar il stress creà tras la societad, la lavur ed il mund da telecommunicaziun.

Prest 3/4 da tut las Svizras e tut ils Svizzers èn da l'avis che ir viadora en la natira e il meglier med per far frunt al stress. Igl n’è betg mo il fatg d'esser en la natira, mabain en emprima lingia il sa mover e viandar. Perquai saja era nagina surpraisa ch’il viandar è en Svizra l’activitad la pli derasada, di Martin Nydegger, il directur da Svizra Turissem.

Martin Nydegger, il directur da Svizra Turissem en il guaud da Turitg.
Legenda: «La Svizra è il pajais da siemi per ils amaturs dal viandar», di Martin Nydegger, il directur da Svizra Turissem. RTR / Adrian Camartin

Tenor il studi sa decleran prest 60 pertschient da la populaziun sco viandants activs. Cun quai saja il viandar apprezià tuttina fitg per relaxar sco la televisiun, Netflix e Spotify ensemen.

audio
Mezdi: Campagna da stad da Svizra Turissem
ord Actualitad dals 06.05.2019.
laschar ir. Durada: 3 minutas 14 Secundas.

Gronda rait da sendas da viandar

«La Svizra è il pajais ideal per tut quels che charezzan il viandar en la natira», di Martin Nydegger. En tut dumbra la rait da sendas da viandar en Svizra 65’000 km, quai che correspunda a la distanza d'ina giada e mez enturn il mund. E quellas sendas vegnan era duvradas dals turists. La stad van prest 2/3 da tut ils giasts che stattan sur notg a viandar ina ni pliras giadas. Cunzunt ils giasts tranter 18 e 35 onns èn attaschads a quai passatemp.

RR actualitad 12:00

Artitgels legids il pli savens