La decisiun sch'el duai candidar per il Cussegl federal u betg na saja betg stada ina difficila, quai ha ditg Martin Candinas sin dumonda da RTR. Per el saja gia stà cler curt suenter la demissiun da sia collega da partida Doris Leuthard che ses num na figurescha betg sin il ticket da la PCD.
Per l'ina plaschian ses mandat en il Cussegl naziunal e las incumbensas ch'el haja anc daspera en il Grischun fitg bain ad el. Per l'autra veglia el chattar er vinavant temp per sia famiglia giuvna. Sia finamira politica saja actualmain la reelecziun en il Cussegl naziunal l'onn proxim.
In represchentant dals basegns muntagnards
El sez na less pia betg ir en la cursa per in sez en il Cussegl federal, ma tuttina giavischa Martin Candinas candidatas u candidats da chantuns muntagnards. I saja impurtant che betg mo ils basegns urbans vegnian represchentads en la regenza svizra mabain er quels da las persunas en chantuns muntagnards. Tge persunas che correspundian a questas pretensiuns ha Candinas dentant betg vulì tradir.
La dumonda da las dunnas: Gea, dentant betg sulettamain
Cun las demissiun da Doris Leuthard pretendan blers puspè ina dunna en il Cussegl federal. Er per Martin Candinas èsi cler ch'i dovra sin il ticket er dunnas ma betg sulettamain dunnas.
RR novitads 16:00