Star a sulegl da stad sper il Rain e tadlar musica uschia che era ils vischins audan? Basilea-Citad decida a l'urna.
Tadlar musica senza lubientscha
Fin oz dovran ins ina lubientscha per tadlar musica cun autpledaders en il spazi public a Basilea. Ma, duain ins pudair tadlar il di ora musica sur autpledaders senza avair ina lubientscha? Questa dumonda preoccupescha Basilea-Citad ed i vegn discutà davart ina revisiun da la lescha correspundenta. Tenor la revisiun fiss ina lubientscha be pli necessaria durant la notg (a partir da las 22:00 enfin las 07:00 la bun'ura). Durant il di (da las 07:00 enfin las 22:00) pudessan ins danovamain tadlar musica cun autpledaders nua ch'ins vul e quai senza lubientscha.
Referendum cunter nova regulaziun
La regenza ed il Cussegl grond sustegnan la nova regulaziun. Dentant datti in referendum encunter la revisiun da la lescha. Il referendum vul mantegnair l'obligaziun da dumandar per ina permissiun. Il comité da referendum tema ch'i vegn massa dad aut en il spazi public, sche mintgina e mintgin dastga tadlar nua e quant dad aut musica ch’el ni ella vul.
L'obligaziun da dumandar per ina permissiun per autpledaders durant il di vegn discutada en il rom da la revisiun da la lescha penala da surpassament. En quel vegnan tractads delicts pitschens. Basilea votescha ils 24 november davart la revisiun. Il Cussegl grond ha approvà la revisiun cun 73 encunter 14 vuschs.
Autpledaders en Grischun
A Cuira pon ins tadlar musica en il spazi public era cun autpledaders. Dentant mo uschè dad aut ch’ins na disturba betg terzs. Durant il ruaus da la notg èsi dentant scumandà da duvrar ils autpledaders en il liber.
RR actualitad 11:00