La Citad da Turitg vul savair tge consequenzas che la distribuziun da cannabis regulada ha: ella ha lantschà per quest intent in studi da passa trais onns. Participantas e participants pon retrair a las apotecas products da cannabis standardisads. Il studi vegn manà da la clinica universitara psichiatrica da Turitg, han communitgà oz ils responsabels. La finamira saja da chattar la meglra relaziun pussibla cun la droga. Sulettamain en la citad da Turitg consumeschan tranter 140'000 e 150'000 persunas cannabis. Il studi duai mussar co ina politica da drogas per l'avegnir duai guardar ora.
Entras in scumond na vegn il consum betg franà, ma entras in scumond vegn la prevenziun a la curta.
Pretsch sco sin il martgà nair
Cun regular a tgi ch'il cannabis vegn dà giu, duai il consum vegnir pli pauc ristgà. Tar cannabis che vegn vendì sin il martgà nair, saja betg cler quant THC ch'el cuntegnia. Plinavant possian er esser en substanzas che fan donn. Vitiers vegnia er ch'i dettia en il martgà nair er cannabinoids sintetics che pon chaschunar grevs donns da sanadad.
En rom dal studi duain dentant vegnir vendids products da bio svizzers ch'èn standardisads e vegnan controllads. Tgi che duai producir quels n'è anc betg cler. Il pretsch per il product duai esser sumegliant sco quai ch'el è sin il martgà nair.
Consuments duain fundar Social Clubs
En la citad da Turitg duai il cannabis vegnir vendì en apotecas. Quellas hajan la savida necessaria. Da l'autra vart duai dentant era dar uschenumnads Social Clubs. En quels duai lura esser pussaivel da consumar communablamain. Uschia duain vegnir cuntanschids er quels che guntgeschan uschiglo posts uffizials. Fin a 10 tals clubs duai dar cun mintgamain 50 fin 100 consuments.
Maximal 10 grams THC il mais
Ils participants e las participantas al studi duain survegnir mintgamai maximal 10 grams THC il mais. Products duai dar cun differents gusts e differentas fermezzas. Plinavant survegnan quellas persunas ina carta d'identitad speziala en cas ch'i vegnissan en controlla da polizia. A partir da l'atun 2022 duai il cannabis esser accessibel.
Projects en bleras citads
A Turitg pondereschan ins gia dapi il 2006 da realisar in tal studi. Naufragi ha quai dentant fatg perquai ch'i ha fin ussa dà nagina basa legala. Quest onn va dentant en vigur ina lescha che lubescha d'experimentar. Uschia è la via libra per emprovas da pilot cun la vendita regulada da cannabis.
Pliras autras citads svizras han er già annunzià interess da sa participar a tals studis. Uschia per exempel Genevra e Son Gagl. Quellas citads vulan er cumenzar ils mais che vegnan cun lur projects.
Ord l'Archiv
En la sessiun da primavaira dal Cussegl naziunal il 2020 mavi per lubir quests projects da pilot. L'opiniun da Martin Candinas e d'Anna Giacometti.
