Actualmain visitan da quai dad indesch uffants la canorta rumantscha a Turitg. Mintgamai il glindesdi portan ils geniturs lur uffants en il center da famiglias da la fundaziun GFZ, datiers dal Museum d'art da la citad da Turitg. A partir da l’avust datti dentant intginas midadas impurtantas. La canorta, che vegn dapi sia fundaziun avant sis onns purtada da l'uniun privata 'Canorta rumantscha Turitg', vegn lura integrada dal tut en las structuras da la fundaziun GFZ che maina a Turitg gia 15 canortas cun circa 2'000 uffants. Per Remo Pfister, il president actual da l'uniun purtadra, in pass fitg impurtant.
Nus avain mussà ils ultims sis onns che l’offerta da la canorta rumantscha è dumandada. Cun quest pass vegn ella er a pudair exister en il futur.
Per l'uniun munta quai ch'ella surprenda in'autra rolla. Ella n’è il futur betg pli la purtadra directa da la canorta, mabain plitost promotura. Tenor Remo Pfister haja quella midada gronds avantatgs. Cunquai che la canorta rumantscha daventa part dal manaschi da la GFZ, èsi en il futur pli simpel d’adattar e schlargiar la purschida als basegns da las famiglias rumantschas da Turitg.
L'integraziun ha plinavant er l’avantatg che las plazzas en la canorta possian profitar da sustegns finanzials da la citad da Turitg, quai che n'è enfin ussa betg stà pussaivel. E gist quai augmentia era cleramain l'attractivitad da la canorta rumantscha, è Remo Pfister persvas.
Quai po esser in factur ch'ina u pliras famiglias èn lura prontas da purtar lur uffants en la canorta rumantscha. Famiglias che n’avessan betg fatg quai pervia da lur situaziun finanziala.
La canorta rumantscha a Turitg vegn pia tschentada sin in fundament nov che duai garantir l'existenza da quella purschida impurtanta per las famiglias rumantschas er ils proxims onns. L'uniun haja dentant vinavant da far, di Remo Pfister che surdat quest'emna il presidi a ses successur Gian Andri Caviezel. Ina sfida permanenta è da chattar persunas qualifitgadas che discurrian rumantsch per la tgira dals uffants.
Il mument avain nus duas persunas, nus duvrassan dentant anc ina terza persuna. Quella vacanza exista gia dapi pli ditg e vegn pli probabel er anc ad exister ils proxims mais.
In'autra incumbensa è da rinforzar la basa finanziala da l'uniun. E qua vul l'uniun ‘Canorta rumantscha Turitg’ ir ina nova via. Els èn a la tschertga da madritschas e padrins ch'èn pronts da surprender responsabladad finanziala.
Quel padrinadi dovri, sche nus avain cumprà ina plazza en la canorta ma che la famiglia banduna la citad u na po per in autra raschun betg laschar ir l’uffant en la canorta. Per questa situaziun tschertgain nus padrinadis per ina fin duas plazzas en la canorta.
E per meglierar la cassa da l'uniun 'Canorta rumantscha Turitg' han els plinavant organisà in concert da benefizi ensemen cun l’Ensemble Cantus firmus Surselva. Il concert ha lieu ils 22 da matg en la baselgia Herz Jesu a Wiedikon. La suprastanza da l'uniun è persvasa dal concept nov che duai garantir la finanziaziun da la canorta rumantscha era per ils proxims onns.