Sco la Viafer retica ha communitgà è la lingia da tren tranter Cuira ed Arosa puspè averta. La lingia è stada interrutta pervia d'ina planta ch'era crudada sin il traject. Ils passagiers èn vegnids transportads cun bus. Puspè averta è er la lingia da tren tranter Puntraschigna e Poschiavo. Quella aveva stuì vegnir serrada perquai ch'i aveva naiv sin ils binaris. Perquai che era la via dal Bernina è stada serrada n'èsi betg stà pussibel da transportar ils viagiaturs cun bus. Entant è er la via puspè averta.
Las pli bleras vias en il chantun èn anc cuvertas cun naiv. L'autostrada A13 ha anc naiv tranter Andeer ed il tunnel dal San Bernardino. Serrads per motivs da segirtad èn ils pass dal Flüela, Fuorn e Lucmagn. Er serrada è la via da Vinadi ad Acla da Fans. Per il Pass dal Malögia vala in obligatori da chadainas. Per transportar l'auto tras il tunnel dal Veraina èsi da spetgar a Selfranga 30 minutas.
Nagin traffic da trens tras il Gottard
Pervi da navaglia è anc adina restrenschì fermamain il traffic da viafier al Gottard. Sin il traject tranter Erstfeld, chantun Uri, e Biasca, chantun Tessin, na curseschan il mument nagins trens da passagiers. Quai ha communitgà la SBB. Er il traffic da vitgira è interrut. I vegnia fatg il pussaivel da rumir la naiv, uschia communitgescha la SBB. I saja dentant da far quint cun retards e che trens crodan or. En il Tessin curseschan per part bus che remplazzan ils trens.
Con ditg che las interrupziuns ed ils impediments tar il traffic cuzzan n’è betg anc cler. Ier suentermezdi è er la staziun da Bellinzona stada serrada pervia da la naiv. En il decurs da la saira cursavan ils trens dentant puspè là.
RR novitads 08:00++
