Ils davos dis èsi fitg grev per ils meteorologs da far prognosas. Ins dovra dapli temp che usitadamain. Quai ha da far cun la situaziun actuala da l'aura.
In caos meteorologic
Dapi in temp datti sur la Svizra pliras pitschnas zonas da pressiun bassa ed auta. Uschia èsi grev da savair co che l'aura sa sviluppa. Surtut n'èsi era betg lev d'eruir cura e nua ch'i po dar urizis u plievgia locala. La situaziun meteorologica po numnadamain sa differenziar fermamain da regiun tar regiun. Quai po era irritar ina u l'autra persuna che dovra applicaziuns che predian l'aura. Là poi esser che l'applicaziun mussa il simbol da bell'aura, da trid'aura e d'urizi en il medem mument.
Luzian Schmassmann, meteorolog tar SRF Meteo, declera che quai n'è betg fallà cunquai che l'aura po numnadamain sa midar uschia entaifer paucas minutas. Tar grondas zonas da pressiun auta e bassa che laschan sa differenziar levamain èsi pli cler co l'aura sa mida. Numnadamain pon ins lura dir exact cu e nua ch'i vegn a plover.
RR actualitad 07:00