Caritas Svizra supplitgescha il cusseglier federal Alain Berset che famiglias povras dastgan prender ord la franschisa ils custs da medi en connex cun tractament dal coronavirus. Pertge «tuts umans en Svizra duain pudair sa laschar testar tar in suspect sin la malsogna Covid-19 senza quitads finanzials», scriva l'organisaziun caritativa. Ils custs duain vegnir pajads ord il pachet da mesiras ch'il Cussegl federal ha decidì.
Tenor la Caritas èn bleras famiglias pervi da la crisa da Corona en ina situaziun d'urgenza acuta. Tar in suspect sin la malsogna dal nov coronavirus na possian blers umans povers betg sa prestar las examinaziuns necessarias, perquai che lur cassa da malsauns na surpiglia betg ils custs pervi da la franschisa.