A l'ur dad in'occurrenza litterara sin il Monte Verità sur Ascona, ha l’anteriura schefaccusadra da l’ONU, Carla Del Ponte, danovamain pretendì in cumond d’arrest internaziunal per il president russ Wladimir Putin. Quai ha ella ditg envers la gasetta «Le Temps». Bain possia el pir vegnir mess davant dretgira cura ch’el na saja betg pli en uffizi, dentant haja la giustia pazienza.
Ses crims da guerra na suranneschan betg e Putin na vegn betg a restar president en perpeten.
Uss saja impurtant da rimnar cumprovas per ses crims da guerra en l'Ucraina. Ella enconuschia Putin gia daditg. Las bumbas cun granatas en Siria hajan mussà segns russ. Ella veglia savair tge segns che las bumbas cun granatas en l'Ucraina hajan.
La giurista svizra Carla Del Ponte è stada schefaccusadra da la curt penala internaziunala per l'anteriur Jugoslavia (1999-2007) e da la curt penala internaziunala per Ruanda (1999-2003). Ultra da quai era ella part d'ina cumissiun da l'ONU per l'investigaziun da la violaziun dals dretgs umans en Siria.
