Siglir tar il cuntegn

Header

audio
Prevenziun a cartels è pli ferma suenter il cas grischun, di il vicedirectur da la WEKO Frank Stüssi
Or da Actualitad dals 27.01.2022.
abspielen. Laufzeit 3 minutas 3 Sekunden.
cuntegn

Cartels en Svizra Stüssi:«Il cas Grischun ha procurà per dapli sensibilisaziun»

Il cartel da construcziun en il Grischun ha procurà per bleras e grondas lingias grassas. La dimensiun dal cartel n’ha betg mo occupà il grischun, mabain era sur cunfins. In motiv ch'i dat ussa dapli annunzias da pussibels auters cartels tar la WEKO.

Mez schaner ha la cumissiun da concurrenza WEKO annunzià d’intercurir in pussibel cartel en la Svizra franzosa. Examinadas vegnan quatter firmas ord la regiun dal Giura, Neuchâtel, Friburg e Vad. Il suspect saja che offertas per sanaziuns da vias lateralas sajan vegnidas manipuladas, conferma il vicedirectur da la WEKO Frank Stüssi envers RTR. Sin quai han ins era fatg perquisiziuns da chasas tar quellas firmas.

Cun quai che l’examinaziun è pir a l’entschatta, na pon ins anc betg dir dapli. Uschia resta entant avert, da tge dimensiuns ch’ins discurra tar il cartel en la Romandie. L’unic che Frank Stüssi po confermar è ch'il pussibel cartel è ì sur onns. Tar il suspect da cartel en la Romandia quinta la WEKO cun 2 onns per l’examinaziun.

Cartel da construcziun Grischun ha sensibilisà

Dentant constatescha Frank Stüssi ch'il cas en il Grischun ha procurà en tut la Svizra per ina pli auta sensibilitad en chaussa cartels – oravant tut era tar las autoritads. Vitiers vegn che la WEKO è en contact cun chantuns e Confederaziun per sensibilisar responsablas e responsabels da vegnir attent sin pussibels cartels.

Il cas Grischun ha dentant era occupà la politica. Uschia è vegnì revedì il dretg da las acquisiziuns publicas. Per exempel che Confederaziun e chantuns ston annunziar a la WEKO cas suspects. En ils chantuns vegnian las disposiziuns per il mument ratifitgadas, e tar la Confederaziun sajan quellas dapi in onn en vigur, di Frank Stüssi.

Attenziun pli gronda munta meglra prevenziun

Uschia han ins d’ina vart pli gronda paisa da la tematica tar las autoritads, e da l’autra vart ils rapports dal cas grischun ch'han dà dapli paisa da vegnir attent sin cartels. Ensemen mainia quai ad ina pli gronda sensibilisaziun: Ins è pli attent ed uschia daventa era la prevenziun pli gronda, di il vicedirectur da la WEKO Frank Stüssi.

RTR actualitad 11:00

Artitgels legids il pli savens

Scrollar a sanestra Scrollar a dretga